Jarduera honetan hiru jolas kooperatibo proposatzen dira. Horien helburua da ikasleek lankidetza eta elkartasunaren garrantzia baloratzea aurrera egin ahal izateko. Hiru jolasak edozein adinetako ikasleekin egin daitezke; desberdintasun bakarra da irakasleak zailtasun maila egokitu behar duela mailaren arabera. 

Hiru jokoek helburu bera dutenez, jarraian egin daitezke (edo bat edo bi besterik ez, denboraren arabera). Ondoren, elkartu eta hausnarketa bat egin dezakete, ikasle bakoitzak adieraz dezan jarduera bakoitza zer iruditu zaion, nola sentitu den eta zein ondorio atera ditzakegun, aldi berean lankidetza eta elkartasunaren inguruan hausnartuz.  

Amarauna

Irakasleak tamaina askotako zuloak dituen amaraun bat sortuko du haril batekin, hainbat altueretan lotuz eta gurutzatuz. Jarraian, ikasleei azalduko zaie sarea zeharkatu behar dutela hura ukitu edo mugitu gabe. Gainera, ezingo dute aurrekoak erabilitako igarobide bera erabili (seinale bat jar daiteke erabili direnak markatzeko).  

Ez zaie azalpen gehiagorik emango eta askatasuna emango zaie euren kabuz saiatzeko edo, hala bururatzen bazaie, elkarri laguntzeko. Ikasle guztiek amarauna zeharkatu dutenean, berriro egiteko eskatuko zaie arau berdinak jarraituz (ez ukitu, ez mugitu edo ez erabili aurreko parte-hartzailearen igarobide bera). Dena den, oraingoan elkarlanean egin beharko dute lan beste aldera igarotzeko. 

Jarduera gehiago zaildu daiteke esanez ezin dutela hitz egin eta keinu bidez soilik komunika daitezkeela edo jokoa amaitzeko denbora mugatua dutela. 

Taldekide guztiak amaraunaren beste aldera igaro direnean, jarduera nola egin duten aztertuko dute: Lehen aldian eta bigarrenean nola sentitu diren, zein lankidetza mekanismo sortu diren, lortuko zutela uste zuten... 

Azkenik, hausnartuko dute elkarlanean arituz errazagoa dela helburuak lortzea eta gauza batzuk bakarrik egin daitezkeen arren, taldean modu solidarioan lan eginez askoz gehiago egin daitekeela aurrera. 

Eman buelta izarari 

Irakasleak izara edo oihal handi bat jarriko du lurrean eta taldeko neska-mutilak gonbidatuko ditu izararen gainean jartzera, maindirearen eremu erdia betez (asko badira, hainbat izara erabil daitezke).  

Ondoren, denak izararen gainean daudenean, eskatuko zaie izarari buelta emateko izaratik atera edo lurra ukitu gabe. 

Ekintza amaitu ondoren, eztabaida sortuko da, non taldekideek erabilitako estrategiak identifikatuko diren: izarari buelta nola eman dioten, jatorrizko plana aldatu behar izan duten eta elkarlanak zenbat lagundu duen, pertsona bakarrak ezin izango baitzuen hori bere kabuz egin 

Aulki kooperatiboak 

Parte hartzaile bakoitzak aulki bat beharko du. Aulkiak borobilean jarriko dira eta musika-aparatu bat ere beharko dugu. Jarduera aulki joko klasikoaren bertsio bat da. Musika entzungo da eta, gelditzerakoan, denek eseri egin beharko dute. Hurrengo txandan aulki bat kenduko da, baina ez da inor kanporatuko, eta lehen txandan egindakoa errepikatuko da. Inork ezin du zutik geratu. Dena den, aulkiak falta direnez, beti egongo da zutik geratuko den norbait; gainera, geroz eta gehiago izango dira eta aulkiak ahal bezala partekatu beharko dituzte, musika gelditzen denean inork lurra ukitu ez dezan.  

Irtenbidea denen artean bilatu beharko dute eta elkar lagundu, inor erori edo baxu gera ez dadin. Ondoren, elkarlanaren eta inor ez diskriminatzearen garrantziaz hausnartuko dute, geure izaerak ez baitu garrantzirik. 

Jarduera hau 2021-2022 elkartasun-kanpainaren esparruan proposatu da: